Passa-Pòrts Bandèu

En 2022, que i aurà era 17au edicion deth festival Passa-Pòrts, neishut en 2004, a Montrjau. Un an après era neishença deth Ostau Comengés, que mos semblèc alavetz que mos caliá crear un eveniment que hussa ua veirina dera cultura occitana en Comenge, un hestau dubèrt aths "especialistas" e aths "non-especialistas". Que l'avem batejat Passa-Pòrts, en referéncia aths pòrts deths Pirenèus, aqueris còths que mos permeten d'anar de cap aras autras vaths e aras autras culturas.


Era prumèra edicion, mercada pera venguda de Lou Dalfin, qu'é un succès que permet de perenizar era manifestacion. Eras annadas seguentas, qu'acuelhem artistas venguts deths quate cantons dera Occitania (Lou Seriol, Coriandre, Tres a cantar, Castanha e Vinovèl, Corbefin-Marsac, Cance-Courtial, Traucatèrme...), dera Gasconha pirenenca (Arredalh, Totis tres, Parpalhon, Espartenhas, Alidé Sans, Eth Chòt, Bouilleur de sons, Revelhet...) o deth costat sud deths Pirenèus (La Sonsoni, Lo Aragon, Sergi Llena). E tant d'autis ! Mès Passa-Pòrts, n'é cap solament un gran bal trad' ! Qu'é tanben era Jornada deths Gafets, qu'amassa quauquarren coma 300 collegians a qui espectacles gratuïts son proposats (La Rampe-TIO, Arnaud Cance, Yves Durand, Alidé Sans, Mathieu Barés) e qui son tanben actors dera hèsta. Que son tanben exposicions, conferéncias, estagis, cantadas, caminadas toponimicas o encara ua corsa a pè.


Era annada 2020 qu'é ua virada. Pr'amor dera crisa sanitària, Passa-Pòrts qu'é annulat, coma en 2021. Que decidam alavetz de mos i tornar en tot deslocalizar Passa-Pòrts a Sent Gaudenç. Gràcia a de navèths partenaris (Comuna, 5C, Le Régent, l'Indépendante, eth OT, eth collegi D. Daurat), que volem botar era cultura occitana ath còr dera capitala deth Comenge e proposar activitats pendent ua setmana sancera, en tot multiplicar atau eras conneccions entram eths diferentis publics. Que serà ua aventura mès qu'èm motivadis coma james.



Passa-Pòrts 2022 : ua edicion que tòrna lançar eth hestenau dab ua progamacion ambiciosa...


Aficha Passa-Pòrts 2022

Telecargar eth program



Aquera 17au edicion que's passarà deth 28 de març ath 3 d'abriu e que i aurà un hèish d'activitats de totas condicions.


logo
Tota era setmana, era nòstra exposicion bilingua "Era Sent Joan / Comminges-Barousse" que serà installada en salon deth cinemà Le Régent.

logo
Eth dimars 29 de març, que demoraram ath cinemà on seràn projectats tres corts-metratges en occitan (ST en francés) dera Télé Buissonnière (Votzes de femnas e Camins de vida) e deth Ostau Comengés (Eras hemnas dera Baderca).

logo
Eth dimècres 30, ua lecture de textes literaris en occitan que serà organizada ara librariá l'Indépendante, a partir de 16 h. A 18 h, Alidé Sans que serà en concert ath auditorium dera mediatèca intercomunala.

logo
Eth divendres de vrespada, eth teatre Jean-Marmignon qu'acuelherà 300 collegians e liceans qu'aprenguen eth occitan. Qu'assistaràn ath espectacle de Joan Miquèu Espinasse, Còrnamusas occitanas peus nuls, e a un concert d'Alidé Sans. Eth ser, qu'arreceberam Michel Feltin-Palas, jornalista ath Express, que balharà ua conferéncia aperada : "Qu'è un accent e alavetz ?" ath auditorium dera 5C.


logo
Eth dissabde, de 10 h a 17 h, plaça aths estagis entaths confirmats :
logo
aboès (P. Rouch), boha (J.-M. Espinasse), acordeon (M. Castanet), cant polifonic (B. Zaoui), conde (J.-P. Ferré), dança (pas d'estiu/fandango, dam J. Etchemaïté).
logo
Era vrespada, ua caminada urbana que permeterà de tornar descobrir eths lòcs emblematics de Sent Gaudenç. Un talhèr de conversacion en gascon que serà tanben proposat en salon deth cinemà. A partir de 18 h, que balharam rendetz-vos aths cantaires e aths musicians
logo
devant era collegiala entà animar eras terrassas deths cafès. A 18 h 30, eths que s'estiman mès eths condes e era boha que poiràn anar véder eth espectacle de Joan Miquèu Espinasse, Còrnamusas occitanas peus nuls, ath teatre. Après, a 21 h, un gran bal occitan qu'é previst ena sala deth Bèthvéder, dambe Arredalh, Joan Miquèu Espinasse solet e Camille en Bal.

Enfin, eth dimenge, a 11 h, eth film d'animacion doblat en occitan (dambe ST en francés), Abril o lo monde trucat, que serà projectat ath Régent.

Entà aver mès d'informacions : contact@ostaucomenges.org



Arretorn sus eras edicions passadas...


Passa-Pòrts 2019






Passa-Pòrts 2018






Passa-Pòrts 2017






Passa-Pòrts 2016






Passa-Pòrts 2015






Passa-Pòrts 2014






Eras prumèras edicions...